شاندەکێ مەزن یێ نۆشدارێن ئەمریکی گەھشتنە دھۆکی

 پارێزگارێ دھۆکێ دیارکر کو شاندەکی مەزن یێ نوشدارێن ئەمریکی گەھشتینە دھۆکێ دێ د سێ وارن دا خزمەتێ پێش کێش کەن.

فەرھاد ئەمین، پارێزگارێ دھۆکێ دیارکر کو گرۆپەکێ د رێيا زانکۆیا ئەمریکی یا کوردستان و دەزگەھێ خێرخوازی یێ بارزانی و ساخلەمیا دھۆکێ ئەڤ کارێ ھاتیە کرن کو مەزنترین گرۆپێ نوشدارانە ژ وەلاتێ ئەمریکا ھاتین و خەلکێ جۆر و جۆر د ناڤ گرۆپی دا ھەنە ئەڤ شاندێ نوشدارێن ئەمریکی دێ سێ کارێن سەرەکی ئەنجام دەين ئەو ژی خزمەتکرنا پێشمەرگێ قارەمان و خزمەتکرنا ئاوارە و پەنابەران ود وارێ زانستی و نوشدارى دا ژی ب ریێا زانکۆیا ئەمریکی کوردستان بشێین خزمەتا سیستەمێ ساخله‌ميێ بکەين ل کوردستانێ ب گشتی ئەز د وێ باوەرێ دا مە ئەڤە دێ بیتە دەرگەھەکێ گەلەک گرنگ بۆ مە، بۆ پێشخستنا سیستەمى و دەلیڤەكا باش بۆ قوتابیان، ئەم دەستخۆشیێ ل زانکۆیا ئەمریکی یا کوردستان دکەين.

سیروان محه‌مەد ئەسوه‌د، رێڤەبەرێ گشتی يێ ساخلەمیا پارێزگه‌ها دھۆکێ ب وه‌كاله‌ت دیارکر کو شاندێ نوشدارێن ئەمریکی پێکھاتیه‌ ژ ٤٠ نوشدار و ستافێ ساخلەمیێ دێ چەندین نشتەرگەریان بۆ وەلاتیان ئەنجام دەن دێ بۆ ماوێ سێ حەفتیان ل پارێزگەھا دھۆکێ خزمەتێن ساخلەمیێ بێ بەرامبەر پێش کێشی خەلکى کەن.

ئاشکەرا کر کو ئەڤ شاندێ نوشدارێن ئەمریکی دێ ل نەخۆشخانا ئازادی یا فێرکرنێ و نەخۆشخانا ژن و زارۆبوونێ و نەخۆشخانا ھاوارھاتنێ و نەخۆشخانا سۆتن و جوانکاریێ ل دھۆکێ بن دێ خزمەتا خەلکێ کێم دەرامەت و پێدڤی نشتەرگەریان کەن دێ نوشدارێن پارێزگەھا دھۆکی ژی ل گەل شاندێ نوشدارێن ئەمریکی کار کەن.

وەحید ئەمین سەلیم، بەرپرسێ ئوفیسا دھۆک یێ دەزگەھێ خێرخوازی یێ بارزانی دیارکر کو زانکۆیا ئەمریکی – کوردستان ل دھۆکێ ب ھەماھەنگی ل گەل ساخلەمیا دھۆکێ و دەزگەھێ خێرخوازی یێ بارزانی رابووینە ب ئەنجامدانا ورک شۆپەکی بۆ نوشدار و رێکخراو و زانکۆیا ئەمریکی یا کوردستانێ دێ ب ھەڤکاریا ساخلەمیا دھۆکێ نشتەرگەریان ژى بۆ خەلکێ خودان پێدڤیێن تایبەت و کێم دەرامەت و کەسێن تووشی نەخۆشین گران بووین کەن، ھەروەسا ژی دێ شاندێ نوشدارێن ئەمریکی خزمەتا پێشمەرگێ قارەمان ژی کەن ب تایبەتی ئەو پێشمەرگێن ل بەرۆکێن شەری بریندار بووین دێ چارەسەریا وان ھێتە کرن ئەم ھیڤی دارین ئەڤ شاندێ نوشدارێن ئەمریکی نە ب تنێ بۆ ڤی جارێ بەلکو گەلەک جارێن دی بھێن خزمەتا خەلکێ دھۆک بکەن.