شاندەکێ ساخلەمیا بەغدا سەرەدانا دهۆکێ دکەت

 رێڤەبەرێ گشتی یێ ساخلەمیا پارێزگەھا دھۆکێ دوھی 27/11/2018 پێشوازی ل د. خەمیس سەعد، نوونەرێ وەزارەتا ساخلەمیا عیراقی و دکتۆر فەلاح ئەلتایی، رێڤەبەرێ گشتی یێ ساخلەمیا پارێزگەھا نەینەوا کر و د ھەڤدیتنەکێ دا بەحسێ پێدڤی و کێماسیێن کەرتێ ساخلەمیێ د ناڤ کەمپێن ئاواران دا کرن.

د. نزار عسمەت، رێڤەبەرێ گشتی یێ ساخلەمیا پارێزگەھا دھۆکێ د ھەڤدیتنەکێ دگەل شاندێ وەزارەتا ساخلەمیا عیراقێ بەحسی رەوشا ئاواران د وارێ ساخلەمیێ دا و ئەو گڤاشتنا مەزن یا ل سەر دام و دەزگەھێن ساخلەمیا دھۆکێ دروست بووی، ژ بەر وێ ھژمارا زۆر یا ئاوارە و پەنابەران ل سنۆری پارێزگەھا دھۆکێ کر و داخواز ژ شاندێ وەزارەتا ساخلەمیا عیراقێ کر پتر ھەڤکاریا ساخلەمیا دھۆکێ بھێتە کرن د واری ساخلەمیی دا بۆ خزمەتکرنا خەلکێ دھۆک و ئاوارە و پەنابەران.
د. خەمیس سەعد، نوونەرێ وەزارەتا ساخلەمیا عیراقێ دیار کر کو ساخلەمیا دھۆکێ پشتەڤانیەکا باش د وارێ ساخلەمیێ دا ل ئاواران کریە و گۆت: “پشتی مە سەرەدانا ھندەک بنگەھێن ساخلەمیێ ل کەمپان کری، مە وەسا دیت رەوشا ساخلەمیێ ل کەمپان گەلەک یا باشە و ھەموو پێدڤیێن نۆشداری و تاقیگەھێ و دەرمانخانێ ل بنگەھان ھەنە.
نوونەرێ وەزارەتا ساخلەمیا عیراقێ ئاشکرا ژی کر، وەزارەتا ساخلەمیا عیراقێ ل بەرە بۆ سالا بھێت 2019ێ ھەڤکاریا ساخلەمیا دھۆکێ بکەت کو زێدەتر گڤاشتن ل سەر ساخلەمیا دھۆکێ دروست نەبیت، ھەتا نوکە رێژەکا زۆر یا ئاواران ل سنۆری ھەرێما کوردستانێ ب تایبەتی ژی ل پارێزگەھا دھۆکێ ماینە و نەزڤڕینە سەر جە و مالێن خوە و گۆت: “نوکە ئەم یێ بزاڤان دکەین کو ب ھەموو شیانێن خوە پشتەڤانیا ساخلەمیا دھۆکێ بکەین د وارێ پتر گەھاندنا خزمەتێن ساخلەمیێ بۆ ئاواران”.
د. فەلاح ئەلتایی، رێڤەبەرێ گشتی یێ ساخلەمیا پارێزگەھا نەینەوا دیار کر کو ئەڤە چار سالن ئاوارێن پارێزگەھا نەینەوا ل پارێزگەھا دھۆکێ ئاکنجی نە و یێن بووینە بارگرانیەکا مەزن ل سەر ھەموو دام و دەزگەھێن حکومەتا ھەرێمێ ل دھۆکێ و گۆت: “نوکە ئەم یێ بزاڤێ دکەین بۆ سالا بھێت ھاریکاریا ئاواران د واری ساخلەمیێ دا بکەین”.