کونگرێ ساخلەمی یێ ھەر چار پارچێن کوردستانێ ل دھۆکێ ھاتە کرن

 رێورەسمێن کونگرێ تەندروستیێ میزوبوتامیا یێ ھەشتێ ل رۆژا ٢٢/٦/٢٠١٩ دەست ب کارێن خوە کر و د ناڤ کونگرەیی دا پێنچ پەنەلێن زانستی ل دۆر نوشداریا نوو ب زمانێ کوردی ھاتنە رێڤەبرن کو د کونگرێ تەندروستی یێ میزوبوتامیا یێ ھەشتی دا چەندین سەربۆرێن زانستێ نوو یێ نوشداری وەکو نەخۆشیا قولون و گرتنا بۆریێن خوینێ و بکارئنانا روبورتی د نشتەگەریێ دا و چەندین نەخۆشیێن دێ یێن ھەستیار ھاتنە شرۆڤەکرن.

د. نزار عسمەت سەرۆکێ کونگرێ تەندروستی یێ میزوبوتامیا یێ ھەشتێ ل دھۆکێ دیارکر کو نوشدارێن باکور و باشوور و رۆژھەلات و رۆژئاڤایی کوردستانێ د کونگرێ میزوبوتامیا یێ ھەشتێ دا ل پارێزگەھا دھۆکێ د پشکدارن کو چەندین پێزانێن و سەربۆرێن نۆشداری د ناڤبەرا نۆشدارێن ھەر چار پارچێن کوردستانێ لێک ھاتنە گوھارتن بۆ خزمەتا گەل و وەلاتێ مە ب زمانی کوردی ئارمانج ژی ئەوە لێکگوھارتنا زانستێ تەندروستی یێ نوشداری ب زمانێ کوردی بھێتە بەحسکرن ئەڤە چەندین کونگرە ھاتنە ئەنجامدان و مفایەکێ مەزن گەھشتیە نۆشداران د بواری نۆشداریا نوو دا ئەڤ سالا ژی ساخلەمیا پارێزگەھا دھۆکێ د گەل زانکۆیا دھۆکێ و ل دھۆکێ بەرھەڤیێن مەزن بۆ ئەنجامدانا کونگرێ میزوبوتامیا پێ ھەشتێ ل دھۆکێ کرینە.

سەرۆکێ کونگرێ تەندروستی یێ میزوبوتامیا یێ ھەشتێ ل دھۆکێ ئاشکرا کر کو سازدانا ڤی کونگرەیی زۆر یا گرنگە بۆ پشتەڤانیکرنا وارێ تەندروستی چونکو ژ ئەنجامێ کونگرێ مێزوبوتامیا د دەمێ شەرێ تیرۆرستێن داعش دا نۆشدارێن کونگرێ میزوبوتامیا ھاتنە ھەرێما کوردستانێ و مل ب ملێ مە ڤە خزمەت پێشکیشکرن و دەرمان و ترۆمبیلێن ھاوار ھاتنێ بۆ ساخلەمیا دھۆکێ دابینکرن مە شیا پێکڤە خزمەتەکا ئێکجار مەزن ئەنجام بدەین.

زێدەتر گۆت: دیرۆکا کونگرێ میزوبوتامیا ڤەدگەریت بۆ سالا ٢٠٠٨ێ د وی دەمی دا پرۆڤیسور حسێن بەگداش د گەل چەندین ھەڤال و نۆشدارێن دی سەرەدانا ھەموو باژێرێن ھەرێما کوردستانێ کرن و سەرەدانا سەرۆک بارزانی کر، دیرۆکا کونگرەیی بەحسکرن بۆ ھندی پشتەڤانیێ پەیدا بکەن ھەر د وی دەمی دا سەرەدانا پەرلەمانێ کوردستانێ دان دیرۆکەکا وەسا ھاتە بەرھەڤکرن دیار بیت ئەڤ کونگرە کونگرەکێ زانستی یە ھەموو نۆشدارێن کورد حەز دکەن ل سەرانسەری جیھانێ د ڤی کونگرەیی دا خر ڤەببن بۆ ھندی خزمەتا مرۆڤایەتیێ بکەن و خزمەتا کەرتێ تەندروستی بکەن و خزمەتا کەسێن ھێژا بھێتە کرن ل ھەموو کوردستانێ.

نەڤەشارت ژی کو گەلەک گڤاشتن ھەبوون ئەڤ کونگرە بمرت و نەمینت، ئانکو کۆنگرێ ھەشتێ یێ میزوبوتامیا نەھێتە ئەنجام دان، ئەڤ خرڤەبوونا نۆشدارێن ھەر چار پارچەیێن کوردستانێ نەمینت ھەر کەسەکی ژ لایەکێ ڤە بزاڤەک کر ئەڤ چالاکیە بھێتە راوەستاندن لێ مە گەلەک ھەڤالان گۆت نەخێر و نابیت بھێتە راوەستاندن چونکو پێشمەرگەیێن قەھرەمان خوینا خوە رێت ھەموو پلانێن دوژمنان ژناڤبرن و کوردستان پاراست ژ پلانێن ھەموو نەحەزان کو پێشمەرگێ قەرەمان ئەڤ بەرگیریا مەزن کر بۆ ھندی ئەم بشێین ئازاد بژین پێدڤیە ئەم نۆشدار ژی نەھێلین و د گەل وان کوردستانا خوە ئاڤا بکەین ھەموو دەمان دوژمنان ھەولدان کرینە کوردستانێ وێران بکەن لێ نەشیاینە و بەردەوام کوردستان بەرەڤ پێشڤەچوونێ بوویە.

د. نزار عسمەت زێدەتر گۆت: کورد حەز دکەن خوە ب رێڤە ببەن و خوە پێش بێخن لێ کوردستان ھەر یا ئاڤەدانە پێدڤیە ئەم نوشدارێن کورد دەستی مە د ناڤ دەستێن ئێک دا بیت د وارێ تەندروستی دا کوردستانێ پتر پێش ڤە ببەین ئەڤرۆکە ل کوردستانێ پرۆژەکێ مەزن ھەیە کوردستانەکا ب ھێز ئاڤا بکەین ئەم نۆشدارێن کورد ژی وەسا دێ شێین وارێ تەندروستی پش ڤە ببەین.

گۆتژی: د قەیرانێ دا زۆر رێکخراوان و دام و دەزگەھێن دھۆکێ پشتەڤانیا مە کریە دەمێ قەریرانێ دا سیستەمێ ساخلەمیا دھۆکێ ھاتیە ئاڤاکرن گەلەک پرۆژە و خزمەت ھاتینە کرن د سالێن قەیرانێ دا پرۆژێن نوژەنکرن و بەرفرەھکرنا دەزگەھێن ساخلەمیێ نوکە ژی ئەڤ بارگرانیا مەزن ل سەر ساخلەمیا دھۆکێ یا بەردەوام چونکو ھێشتا ئاوارە و پەنابەر ل دھۆکێ نە ئەم بەردەوام پێدڤی پشتەڤانیێ و ھەڤکاریێ ینە بۆ گەھاندنا خزمەتێن ساخلەمیێ بۆ ھەموو کەمپ و دەڤەران.

د. عەبدولا جاسم رێکخەرێ گشتی یێ کونگرێ تەندروستی یێ میزوبوتامیا یی ھەشتێ ل دھۆکێ بۆ نوش نیوز دیار کر کو ھژمارەکا نۆشداران ژ سوید و نەمسا و ئەلمانیا بەرھەڤ بووینە د کونگرێ میزوبوتامیا یێ تەندروستیێ ھەشتێ دا ھەتا نوکە پێنچ کونگرە ل تورکیا ھاتینە گێران و دو کونگرە ژی ل ھەرێما کوردستانێ ھاتیە کرن ئەڤە کونگری سیێ یە ل ھەرێما کوردستانێ دھێتە رێڤەبرن.

ئاشکەرا ژی کر کو ئەڤرۆ پشتی کونگرە ب دووماھی دھێت دێ بڕیار ھێـتە دان کا سالا بھێت ل کیژ باژێری کوردستانێ بیت ئەم دی ھەولدەین ل سالا بھێت ل پایتەختی ھەرێما کوردستانێ بھێتە دەست نیشانکرن و سالا بھێت ل ھەولێر کونگرێ میزوبوتامیا بھێتە ئەنجامدان.

پرۆفیسۆر حسێن بەگداش ئێک ژ دامەزرێنەرێن کونگرێ میزوبوتامیا دیارکر کو کونگرێ ھەشتێ بۆ ھەموو نۆشدارێن کورد بوویە ھیڤیەکا مەزن بشێن د وارێ تەندروستی دا پتر خزمەتا گەل و نشتیمانێ خوە بکەن د کونگرەیی دا زانستێ نوو یێ نوشداری دھێتە شرۆڤەکرن مەرەم پێ ئەو زانستێن نوو بگەھنە نەخۆشخانێن کوردستانێ و نەخۆشێن مە مفایی ژێ وەربگرن، ئەڤ کونگرە بۆ تێکەلی و گۆھوڕینا پێزانین و سەربورێن نوو یێن نۆشداری بۆ ھەموو نۆشدارێن کورد گرنگە چونکو زانستێ نوشداری بەردەوام د گوھۆرینێ دایە پێدڤیە ئەم خوە د گەل بگونجینین وی زانستی بگەھینینە وەلاتیێن خوە یێن کورد ل ھەموو جیھانێ.

ئەو ژی دیارکر کو دەمێ شەرێ تیرۆرستێن داعش دژی خەلکێ کوردستانێ ھاتیە کرن دەملدەست مە نۆشدارێن کونگرێ میزوبوتامیا خوە گەھاندنە پارێزگەھا دھۆکێ و دەستی ھاریکاریێ بۆ خەلکێ خوە درێژکر ل وێ دەمی بیرا من دھێت نۆشدارێن بیانێ کوردستان بجە دھێلان و دگۆتن مەترسی یا ھەیی، لێ ئەم نۆشدارێن کونگرێ میزوبوتامیا ھاتینە کوردستانێ مە د گەل نۆشدارێن خوە ل دھۆک و ھەولێر و سلێمانیێ خزمەت پێشکێش کر، ئەڤە ئێکە ژ ئەنجامێن کونگرێ میزوبوتامیا و گەلەک ئەنجامێن دی یێن مەزن و باش ھەبووینە ل کونگرێن بۆری مە شیایە تورەکا نۆشداران پێکڤە گرێدەین و د گەل ئێک خزمەتێ پێشکێش بکەین دێ بەردەوام بین بۆ پتر پشڤەچوونا وارێ تەندروستی ل کوردستانێ ئەم نۆشدار دوور ژ سیاسەتێ پێکڤە کۆم دبین ئەڤە پێنگاڤەکا زۆر یا گرنگ و باشە بۆ خزمەتکرنا وارێ نۆشداری ل ناڤ دام و دەزگەھێن ساخلەمیێ دا ھەڤنیاسین دروست بیت ئەم مفایی ژ ئێکدو وەردگرین.

د. فریاد حوێزی سەرۆکێ فەخری یێ کونگرێ میزوبوتامیا دیارکر کو ئەڤ کونگرە بوویە دەرگەھەک بۆ پتر خزمەتکرنا وارێ تەندروستی ل ھەر چار پارچێن کوردستانێ چونکو د ناڤ کونگرەیی دا گەلەک ژ نۆشداران د بوارێن ژێک جۆدا دا یێ تەندروستی نۆشداریا نوو بەحس دکەن وی زانستێ نوو ژ پارچەکا کوردستانێ دبەنە ھەموو پارچێن دی یێن کوردستانێ ئەم ھیڤیدارین کونگرە سالانە بھێتە کرن و ناڤبەر د ناڤ دا دروست نەبن و ھەروەسا ژی نۆشدار ژی د گەل نەخۆشی ڤێ زانستێ نوو بکاربینیت دا کو خەلکێ مە نەھێتە بێ بەھرکرن ژ زانستی نوو یێ نۆشداری.

بەھزاد عەلی ئادەم، پارێزگاری دھۆکێ ب وەکالەت دیارکر کو گێرانا ڤان جۆرە کونگرێن وەسا مەزن و گرنگ ل دھۆکێ بھایەکێ مەزن بۆ مە ھەیە ئەم وەکو ئیدارا دھۆکێ دەستخۆشیێ ل رێکخستیێن ڤی کونگرەیێ نۆشداری دکەین و ھیڤیدارین ئەڤ کونگرە ببیتە پالپشت بۆ پتر خزمەتکرنا کەرتێ تەندروستی ل دھۆکێ ل سالا ٢٠١٤ێ ھژمارەکا زۆر یا ئاواران قەستا دھۆکێ کرن و گەلەک پەنابەر ل دھۆکێ بوون مە ھەموویان پێکڤە شیان ڤێ ژمارا زۆر یا ئاوارە و پەنابەران ڤەحەوینین و خزمەتا پێشکیشی وان بکەین.