د شهش ههیڤان دا پشكنینێن بهری مارهبرینێ بو پتر 12 هزار كچ و كوران ل دهۆكێ هاتینه كرن
رێڤهبهریا كارۆبارێن خوپاراستنێ ساخلهمیا دهوكێ ئامارا شهش ههیڤێن دهرباز بووی ههموو چالاكیێن خوه ئاشكرا دكهت، زێدهتری 110 تهنێن كهل و پهلان هاتینه ژناڤبرن، پشكنینا مارهبرینێ بۆ 12 هزار كچ و كورا هاتینهكرن.
د.سیروان محهمهد ئهسوهد، رێڤهبهرێ كارۆبارێن خوپاراستنێ ل ساخلهمیا پارێزگهها دهوكێ دیاركر، تیمێن رێڤهبهریا كاروبارێن خوپاراستنا ساخلهمیێ بهردهوام سهرهدانا ههموو نهخوشخانه و بنگههـ و تاقیگهها مهلبهندی دكهت بۆ دووڤچوونا لسهر نهخوشیێن ههڤپشك ب تایبهتی كهیسێن نهخۆشیا لشمانیا، ههروهسا تیمێن ساخلهمیێ سهرهدانا 174 بنگههێن ساخلهمی و كهمپێن پهنابهرێن كوردێن رۆژئاڤا كوردستانێ و كهمپێن ئاوارهیان ل سنورێ پارێزگهها دهوكێ كرینه.
دیاركر ژی د شهش ههیڤێن دهرباز بووی دا پشكا كونترولكرنا نهخوشیێن ڤهگر رابووینه ب پشكنینێ ل 64 گوند و بۆ نههێلانا چهندین جورێن پێشیا ژ جورێن كیولكس و ئونوفلس،گۆت ژی: تیما بهرهنگاریا كرانكهرا رابوویه ب دانانا 18 هزارو 400 خالێن ژههركری ل زێدهتری 400 جهێن جودا ژ بنگههێن ساخلهمیێ ، میری ، كوگههێن ئازوقهی ، ماركێت و قوتابخانهیان.
ناڤهاتی ئاشكراژی كر: ژبهر وهرزێ هاڤینێ تیمێن رهشاندنێ برێكا ئامیرێن جوراوجور رابوویه ب رهشاندنا 876 بنگههێن پێشمهرگهیان ل سنورێ میحوهرێ سحێلا و مهحمودیێ دا كو تووشی چ ئاریشهیێن مشهخورا نهبن.
دهربارهی پشكا چاڤدێریا دایك و زارۆیانژی دیاركر كو ل سنورێ پارێزگهها دهۆكێ 19762 زارۆ دژی ئێشا زراڤ و 18397 زارۆ ب ڤاكسینێ سێیانی و 18337 زارۆ ژی دژی ئێشا سۆركا هاتینه ڤاكسیندان و گۆت: ل كهمپێن ئاوارهیانژی 1150 دژی ئێشا زراڤ و 1582 ڤاكسینا سێیانی و 881 دژی سۆركا هاتینه ڤاكسیندان.
گوتژی: پشكا چاڤدێری و سهلامهتیا خوراكی ئامارێن سهرانسهری پارێزگهها دهوكێ ب ههموو قهزا و دهڤهرداریێن خوهڤه ژ ئامارا گرتن و سزادان و ژناڤبرنێ سهرهدانا زێدهتری 13 هزار جها كریه 142 جهـ هاتینه گرتن ، 671 جهـ هاتینه سزادان، زێدهتری 110 تهن هاتینه ژناڤبرن.
رێڤهبهرێ كاروبارێن ساخلهمیێ گوتژی: ئێك بهشێن ههره گرنگ بهشێ تاقیگههێیه كو د دهمێ شهش ههیڤێن دهربازبووی دا ب ڤی شێوهی بوو، هوبا بهكتریولوجی و هوبا كیمیاوی: 10 هزارو 354 نمونه هاتینه وهرگرتن و 278 ژوان خراپ بووینه، هوبا كرێكاران: 5 هزارو 21 پشكنین ئهنجام داینه و 251 ژوانا پوزهتیڤ دهرچووینه، تاقیگهها ئاڤێ 159 نموونه هاتینهوهرگرتن و پشكنینكرن 20 ژوانا خراپ بووینه.
دیاركرژی: ل شهش ههیڤێن دهرباز بووی ژمارا نهخوشێن شهكرێ 143 هزارو 648 هاتینه توماركرن ژوانا 56 هزارو 200 نهخوشان سهرهدانا كلینیكێن شهكرێ كریه و چارهسهری وهرگرتینه.
لدور پهنجهشێرا مهمكی گۆت: دیاركرنا بلهز بۆ پهنجهشێرا مهمكی سهرهدانێن بۆ بنگههیێن ساخلهمی هزارو 24 پشكنین هاتینه كرن و 480 ژوانا پێدڤی هاتینه رهوانهكرن و گۆتژی: د شهش ههیڤان دا 5781 پشكنینێن بهكتریولوژی وهك نموونه هاتینه وهرگرتن كو 5599 ژێ باش دهرچووینه و 182 ژی خراب.
د.سیروان دیاركر ژی ئامارا ئهو پشكنینێن مارهبرینێ بۆ كچ و كورا ئاشكراكر: پشكنینا مارهبرینی بۆ 12 هزارو 340 هاتینه كرن ژ پشكنین جودا جودا ژ وانا ژی پشكنینا مێلاكێ یا ڤایروسی ژ جورێ بیB 89 حالهتێن پوزهتیڤ بووینه، پشكنینا مێلاكی یا ڤایروسی جورێ سی پێنج حالهت، تالاسیمیا 198 حالهت، هیچ حالهتهكێ ئایدزێ نههاتیه توماركرن.