پارێزگه‌ها دهۆكێ كومبونا ئاسایى یا ژورا عه‌مه‌لیاتا یا به‌رهنگاریا ڤایروسێ كورونا هاته‌ ئه‌نجامدان

له‌به‌راهیێ پارێزگه‌رێ دهوكێ ده‌ست خوشى وسوپاسى ل تیمێن ته‌ندورستى ویێن جێ به‌جێكرنا رێنما وبریارێن جڤاتا وه‌زیران وژورا عه‌مه‌لیاتا یا به‌رهنگاریا ڤایروسێ كرونا كر هه‌روه‌سا سوپاسیا خه‌لكێ پارێزگه‌هێ وخودان كار وپیشه‌یان ژى كر كو هه‌موویان ژبه‌ر به‌رژه‌وندیا گشتى یا خه‌لكێ پارێزگه‌هێ پێگرى ب هه‌موو رێنما وبریارێن حكومه‌تا كوردستانێ وكارگێریا پارێزگه‌هێ كریه‌ بو وێ چه‌ندێ وه‌لاتیێن پارێزگه‌هێ ژڤایروسێ كورونا بهێنه‌ پاراستن وگوت: ئه‌و كار وئه‌ركێن وان ئه‌نجامداین جهێ رێزگرتنێ نه‌ وهه‌لویسته‌كێ نیشتمانى یه‌ وخواست كو هه‌موو لایه‌ن به‌رده‌وام هاریكاربن دگه‌ل ژورا عه‌مه‌لیاتا هه‌تا مه‌ترسیا به‌لاڤبونا ڤایروسى دهێته‌ دوركرن.
ژلایێ خوڤه‌ د.نزار عصمت رێڤه‌به‌رێ گشتى یێ ساخله‌میێ ل پارێزگه‌هێ چه‌ند رونكرن دا نه‌ سه‌ر به‌لاڤبونا ڤایروسى ل چه‌ند وه‌لاتێن ده‌روبه‌ر وجیهانێ و نوترین ئامارێن رێكخراوا ساخله‌میا جیهانى ل دور رێژا كه‌سانێن توشى ڤایروسێ كورونا بوین به‌رچاڤكرن و ته‌كه‌زكر كو هه‌تا نوكه‌ چ حاله‌تێن په‌یدابونا ڤایروسێ كورونا ل سه‌ر ئاستێ پارێزگه‌ها دهوكێ نه‌هاتینه‌ توماركرن.
پاش گه‌نگه‌شێن تێر وته‌سه‌ل ل سه‌ر ئه‌جیندایێن كومبونێ وكێم وكاسیێن كارێ تیمێن جێ به‌جێكار یێن دوڤ چونا بابه‌تێ خوپاراستنێ ژڤایروسێ كورونا دكه‌ن هاتنه‌ كرن.