ئێكهم حالهتێ نهخۆشیا (CJD) ل دهوكێ پهیدابوو
هاتیه بلاڤکرن روژا جارشهمبێ, 22 چریا ئيكى 2008 - 12:53pm
ژنهكا (50) سالی ل دهوكێ تووشی نهخۆشیا ( CJD) بو,ل جیهانێ سالانه ژههر ملیون مرۆڤان ئێك تووش دبیتێ و ئهڤه ئێكهم حالهتێ ڤێ نهخۆشیێ ل عیراقێ دهێته دهست نیشانكرن.
حهمزه رهزیكی
نێزیكی دو ههیڤانه ژنهك دژیێ (50) سالیێ دا ل دهوكێ تووشی نهخوشیهكا گران ببوو,بهلێ پشتی بشكنینێن وێ هاتینه كرن دیاربوو كو تووشی ڤێ نهخۆشیێ بویه,(د.سهگڤان محهمهد صالح) تایبهتمهندێ نهخۆشیێن مێشكی و دهماران ل نهخوشخانا ئازادی یا فێركرنێ,دیسا دیاركر كو ژ نیشانێن ڤێ نهخۆشیێ ئهون نهخۆش دماوێ چهند حهفتیان دا ههموو تشتان ژبیر دكهت و چ بیردانك نامینیت و كهسێن ل دهوروبهرێن خۆ نانیاسیت و ب لهز كارتێكرن ل نهخۆشی دبیت و لهشێ وی ڤهدجنقیت و ههر وهكو جورهكێ ترسیانێ ل دهڤ نهخۆشی ههیه,ئهگهرێ نهخۆشیا ناڤبری ژجورێ پروتینهكی یه كو ژ ڤایروسی بچووكتره و مێشكی دگریت و ناهێته ڤهگوهاستن بو كهسێن دیتر.
(د.سهگڤان محهمهد صالح) نوشدارێ تایبهتمهندێ مێشكی و دهماران ل نهخوشخانا ئازادی یا فێركرنێ ل دهوكێ كو ئهڤ نهخوشیه دهست نیشانكریه ئیشارهت ب وێ چهندێ ژی دا كو ههتا نوكه ئهڤه ئێكهمین حالهتێ ڤێ نهخۆشیێ یه ل عیراقێ دهێته دهستنیشانكرن و چارهسهریا ڤێ نهخۆشیێ ژی ههتا نوكه ل جیهانێ نههاتیه دیتن و چ چارهسهری بو نینه.
ههژیه كو نهخوشیا ناڤبری ل جیهانێ بناڤێ (Creutzfeltd-jacob disease) دهێته نیاسین.