زێرەڤانیا ساخلەمیێ پلانا خوە یا مەھا رەمەزانێ راگەھاند

ساخلەمیا پارێزگەھا دھۆکێ راگەھاند، وان پلانەکا توکمەت بۆ کۆنترۆلکرنا جھێن گشتی ل مەھا رەمەزانێ دانایە.
ئەڤرۆ د پرێسکۆنفرانسەکی دا د. بەختیار ئەحمەد رەشید رێڤەبەرێ کاروبارێن خوپاراستنا ساخلەمیێ ل پارێزگەھا دھۆکێ دیارکر، بەری مەھەکێ ژ ھاتنا مەھا رەمەزانا پیرۆز وان پلانا خوە دانیە بۆ ھندێ زێدەتر کۆنترۆل ل جھێن گشتی بھێتە کرن و ئاماژەکر ، بۆ ڤێ مەھێ ھندەک بریار و رێنمایێن تایبەت دەرکرینە.
ناڤھاتی ئاماژەکر وان سەردانێن تیمێن زێرە ڤانیا ساخلەمیێ ل پارێزگەھێ سەرەدان کرین و گۆت: د بێنج مەھێن بۆریدا تیمێن وان سەرەدانا پتری ٢٠ ھزار جھان ل پارێزگەھێ کریە، زێدەباری گرتنا ٩٢ جھێن گشتی دگەل سزادانا ١٦٥ جھان و ھوشداری ژی دایە ھزار و ١٢٣ جھان.

رێڤەبەرێ کاروبارێن خوپاراستنا ساخلەمیێ ل پارێزگەھا دھۆکێ داخواز ژ خەلکێ کر لدەمێ کرینا ھەر تشتەکی بلا خوە ژ مێژوویا چێکرن و ئێکسپایەرا وی کەرستەی پشتراست بکەت بۆ ھندێ گیانێ وان یێ ساخلەم بیت.
سەبارەت چەپەرێن پێشمەرگەی و ئاوارەیان ژی د. بەختیار ئەحمەد گۆت: دگەل دەستپێکا وەرزێ بھارێ تیمێن وان یێن رەشاندنێ دەست ب رەشاندنا چەپەرێن ھێزێن پێشمەرگەی کریە بۆ ھندێ مێش و مۆر لێ نەمینین و ب ھەمان شێوە ل کەمپێن ئاوارە و پەنابەران ژی.
ژ ئالیێ خوەڤە عسمەت سەلمان بەرپرسێ پشکا چاڤدێری و سەلامەتیا خۆراکی گۆت: وان بۆ مەھا رەمەزان تیمێن خوە کرینە سێ شەفت تا ١٢ شەڤێ دێ دوفچوونا جھێن گشتی کەن، ئاماژەکر، پشتی دەھـ سالان جارەکا دی رێ ب چێکرنا شەربەتا مێویژا ھاتە دان لێ ھندەک مەرجێن تایبەت ھاتینە دان و لسەر ھەموو جھان ھاتینە بەلاڤکرن یێن ب ڤی کاری رادبن بۆ ھندێ پێگیرێ پێ بکەن.
ژ ئالیەکێ دیڤە بەرپرسێ پشکا چاڤدێری و سەلامەتیا خۆراکی گۆت: ل پێنج مەھێن بۆری یێن ئەڤ سالە تیمێ، وان یێن دوڤچوونا جھێن گشتی ٣٦٧ تەنێن کەرستێن ئێکسپایەر یێن ھشک دگەل ١١٥ ھزار لیتر ژناڤبرینە و دیارکر، نھا خودانێن جھێن گشتی زێدەتر ژ جاران ھاریکارن دگەل وان دا بوھندێ ل دەما کەرستەیەکێ ئێکسپایەر دھێتە دیتن ئەوبخوە جودا دکەن.
عسمەت سەلمان خویاکر ژی، وان سێ خالێن گومرکی ھەنە کو ھەر کەرستەیەکێ خوارنێ و ڤەخوارنێ بھێنە دناڤ ھەرێمێ دا دناڤا تاقیگەھێن وان دا پشکنین بۆ دھێنە کرن و گۆت: ژ پشکنینێن پێنج مەھێن بۆری دا یێن فیزیایی ل سەرانسەری پارێزگەھێ ٥٤ ھزار و ٣٠٨ پشکنین ھاتینە کرن و د ئەنجام دا ٣ ھزار و ٥٤٢ نەباش دەرکەتینە.
سەبارەت پشکنینێن بەکتریۆلۆجی ژی ٨٦ ھزار و ٤٤٢ ھاتینە کرن و د ئەنجام دا ٣٠٤ نەباش دەرکەتینە، یێن کیمیاوی ژی ٢٨ ھەزار ھاتینە کرن و د ئەنجامدا ١٩٦ نەباش دەرکەتینە.