كونفرانسێ‌ پێنجێ‌ یێ‌ ساخله‌میا پارێزگه‌ها دهوكێ‌ ب گرنگترین ئامار و ژماره‌ هاته‌ ئه‌نجام دان

پارێزگه‌ها دهوكێ‌ ل سه‌رێ‌ لیستا كوردستانێ‌ و عیراقێ‌ دهێت د بوارێ‌ ژدایكبوونا ژمارا زاروكێن نوی په‌یدادبن,رێژا مرنان ژی ل سالا 2008ێ‌ ل پارێزگه‌ها دهوكێ‌ ژ سالێن بوری كێمتره‌ ئه‌ڤه‌ژی نیشانێ‌ ب وێ‌ چه‌ندێ‌ دده‌ت كو ئاستێ‌ ساخله‌میێ‌ ل پارێزگه‌ها دهوكێ‌ یێ‌ به‌ر ب پێشڤه‌ دچیت. د.عه‌بدوالرحمن ئوسمان,وه‌زیرێ‌ ته‌ندروستیێ‌ حكومه‌تا هه‌رێما كوردستانێ‌ دا د په‌یڤا خودا ل كونفرانسێ‌ پێنجێ‌ یێ‌ رێڤه‌به‌ریا گشتی یا ساخله‌میا پارێزگه‌ها دهوكێ‌ ئه‌وێ‌ ل رۆژا 24/1/2009 و ل ژێر دروشمێ‌ ( پێشڤه‌برنا ئاستێ‌ خزمه‌تێن ساخله‌میێ‌ ئه‌ركێ‌ مه‌یه‌) ئاماژه‌ ب هه‌ردو خالێن ل سه‌ری دیاركری كر و دیسا دیاركر كو ئه‌و پروژه‌یێن ل پارێزگه‌ها دهوكێ‌ د سالا بوری دا هاتینه‌ ئه‌نجام دان شیاینه‌ گه‌له‌ك ژ پێدڤیێن ساخله‌میێ‌ ل پارێزگه‌ها دهوكێ‌ دابین بكه‌ن. د.فازل عومه‌ر,سه‌روكێ‌ جڤاتا پارێزگه‌ها دهوكێ‌,په‌یڤا پارێزگه‌ها دهوكێ‌ پێشكێشكر و تێدا داخوازكر كو حكومه‌ت بشێت هه‌ژاری و نه‌زانین و نه‌ساخیان كێم بكه‌ت داكو جڤاكێ‌ مه‌ ژ جڤاكێن دی بهێته‌ جوداكرن,هه‌روه‌سا خواست كو ل ده‌لیڤه‌یه‌كا هوسا سێگوشا حكومه‌ت و خه‌لك و كادرێ‌ ته‌ندروستی لبه‌ر چاڤ بگرین كو هه‌رسێ‌ ئێكدو ته‌مام دكه‌ن. سه‌روكێ‌ جڤاتا پارێزگه‌ها دهوكێ‌ دانانا كولیجا نوژداری كو سالانه‌ ب ده‌هان قوتابی ژێ‌ ده‌ردچن و دانا سه‌نته‌رێن تایبه‌تمه‌ند كو به‌رێ‌ وه‌لاتیان ژ ده‌رڤه‌ی وه‌لاتی دایه‌ ناڤ پارێزگه‌هێ‌ و گه‌هاندنا ڤاكسینا بو ناڤ مالان ب ده‌ستكه‌فتیێن مه‌زن ل پارێزگه‌ها دهوكێ‌ هژمارتن. رێڤه‌به‌رێ‌ گشتی یێ‌ ساخله‌میا پارێزگه‌ها دهوكێ‌,د.عه‌بدولا سه‌عید عه‌بدولا دپه‌یڤا خودا دیاركر كو بودجا گشتی یا رێڤه‌به‌ریێ‌ ل سالا 2008 (107.342.830.514) دینار بوویه‌ و(52) پرۆژه‌ ل سالا 2008ێ‌ هاتینه‌ ئه‌نجام دان و ژوانا (27) ب دوماهی هاتینه‌ و (25) ل ژێر جێ‌ به‌جێ‌ كرنێ‌ نه‌. ده‌رباره‌ی گرنگترین ئاریشێن كه‌رتێ‌ ساخله‌میێ‌ ژی نه‌بوونا نه‌خوشخانێن نوی ل ده‌ڤه‌رێ‌ كو پارێزگه‌ها دهوكێ‌ پێدڤی ب (4) نه‌خوشخانێن نوی هه‌یه‌ و ئاریشێن هنده‌ك ده‌رمان و كه‌ل و په‌لێن نوژداری كو وه‌زاره‌تا ته‌ندروستی ل به‌غدا ژێ‌ به‌رپرسه‌. رێڤه‌به‌رێ‌ گشتی یێ‌ ساخله‌میا پارێزگه‌ها دهوكێ‌ ئه‌وژی دیاركر كو سسته‌مێ‌ ته‌ندروستی ل هه‌رێمێ‌ یێ‌ ژكاركه‌فتیه‌ و پێدڤی ب چاكسازی و گورینێ‌ هه‌یه‌, ب خورایی بوونا خزمه‌تێن ته‌ندروستی و نه‌پێگیریا خه‌لكی ب رێنمایێن ساخله‌میێ‌ و نزم بوونا ئاستێ‌ ره‌وشه‌نبیریا گشتی و ب تایبه‌ت یا ساخله‌میێ‌ ل جڤاكێ‌ مه‌ و كێماسیا كادرێ‌ ته‌ندروستی ل پارێزگه‌هێ‌ ب تایبه‌ت ل نه‌خوشخانێن سوتنێ‌ و گولان یا گشتی ب گرنگترین ئاریشه‌یێن ساخله‌میێ‌ دانه‌ زانین. پشتی هه‌رسێ‌ په‌یڤ ب دووماهی هاتین كونفرانس هاته‌ دابه‌شكرن بو (3) ته‌وه‌رێن سه‌ره‌كی ل كونفرانسی هاتینه‌ گه‌نگه‌شه‌كرن , ته‌وه‌رێ‌ خوپاراستنێ‌ و خزمه‌تێن چاره‌سه‌ریێ‌ و بابه‌تێن ساخله‌میێ‌ یێن گرنگ كو ژلایێ‌ به‌رپرسێن پروگرام و نه‌خوشخانا د بیاڤێن ژێك جودا دا هاتنه‌ برێڤه‌برن. ب گوهداریا پێشنیازێن ئاماده‌بویان و پێدڤی و پلانا (5) سالی یا رێڤه‌به‌ریا گشتی یا ساخله‌میا پارێزگه‌ها دهوكێ‌, هه‌روه‌سا خه‌لاتكرنا (24) نوژدار و كارمه‌ندێن ساخله‌میێ‌ و فه‌رمانبه‌رێن كارگێری ل ده‌زگه‌هێن ساخله‌میێ‌,‌كونفرانسێ‌ پێنجێ‌ دووماهی ب كارێ‌ خو ئینا. رێڤه‌به‌ریا گشتی یا ساخله‌میا پارێزگه‌ها دهوكێ‌ ژ سالا 2004ێ‌ وه‌ره‌ سالانه‌ د كونفرانسه‌كێ‌ تایبه‌ت دا پێداچوونا كار و چالاكیێن خو یێن سالانه‌ دكه‌ت و پلانا سالا نوی به‌رچاڤ دكه‌ت.