وه‌زیرێ ساخله‌میێ سه‌ره‌دانا ده‌زگه‌هێن ساخله‌میێ ل دهۆكێ دكه‌ت
هاتیه بلاڤکرن روژا دوو شه‌مبێ, 17 ئه‌یلول 2012 - 9:06pm
د.رێكه‌وت حه‌مه ره‌شید، وه‌زیرێ ساخله‌میێ ل حكوومه‌تا هه‌رێما كوردستانێ ب هه‌ڤالینیا شانده‌كی و د. نزار عصمه‌ت رێڤه‌به‌رێ گشتیێ ساخله‌میا پارێزگه‌ها دهۆكێ‌َ، رۆژا 17/9/2012 سه‌ره‌دانا قه‌زایێن ( به‌رده‌ره‌ش، ئاكرێ، ئامێدیێ ) كرن و ل گه‌ل قایمقامێن هه‌ر سێ قه‌زایان و چه‌ند رێڤه‌به‌رێن ناحیان كۆمبوون و دیسان سه‌ره‌دانا چه‌ند ده‌زگه‌هێن ساخله‌میێ كرن.
د.رێكه‌وت حه‌مه ره‌شید دیاركر كو ئارمانج ژ سه‌ره‌دانا وان زانینا كێماسیێن ده‌زگه‌هێن ساخله‌میێ بوویه و خویاكر كو ئاریشه‌یێن ساخله‌میێ ب ره‌نگه‌كێ گشتی ل هه‌رێما كوردستانێ كێمیا نوشداران و ترۆمبێلێن هه‌وارهاتنێ یه و گۆت: ژبۆ ڤێ چه‌ندێ مه ل به‌ره هانده‌رێن نوشداران زێده‌بكه‌ین و هنده‌ك نوشداران ژ ده‌رڤه‌ی وه‌لاتی بینین كو ل ده‌زگه‌هێن ساخله‌میا هه‌رێمێ كاربكه‌ن داكو ئاریشه‌یا كێمیا نوشداران بهێته چاره‌كرن و دیسان مه ل به‌ره ب پشته‌ڤانیا حكوومه‌تا هه‌رێما كوردستانێ (50) ترۆمبێلێن هه‌وارهاتنێ بۆ ده‌زگه‌هێن ساخله‌میێ دابین بكه‌ین.
هه‌روه‌سا كێماسیێن ئامیرێن نوشداری ژی دێ هێنه چاره‌كرن و بۆ سالا بهێت ئه‌و دێ كه‌نه د پلانا خوه دا كو كێماسی كێم ببن.
وه‌زیرێ ساخله‌میێ دیاركر ژی ئه‌و دێ د به‌رده‌وام بن بۆ پشته‌ڤانیكرنا نشته‌رگه‌ریێن ئێڤاریان ل نه‌خوشخانه‌یێن حكوومی و گۆت: ب ئه‌نجامدانا ڤان نشته‌رگه‌ریان كو 80% هاریكاریا نه‌خۆشان ژلایێ حكوومه‌تا هه‌رێما كوردستانێ دهێته كرن بوویه هانده‌ره‌ك كو هاریكاریا خه‌لكه‌كی بهێته كرن و ئێدی نشته‌رگه‌ری نه‌هێنه گیرۆكرن.
هه‌ر وه‌سان وه‌زیرێ ساخله‌میێ یێ حكوومه‌تا هه‌رێما كوردستانێ كلینیكا داسنیا یا شیره‌تكاری ل ته‌نشت نه‌خوشخانا ته‌نگاڤیان ل دهۆكێ ڤه‌كر.
د داخویانیه‌كێ دا د.نزار عصمه‌ت رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو ب ڤه‌كرنا ڤان جوره كلینیكان دێ خزمه‌تا نه‌خۆشان ب شێوه‌یه‌كێ باشتر هێته كرن و ل وێرێ نه‌خوش دێ هه‌موو خزمه‌تێن ساخله‌میێ ب بهایێن گونجای و ئه‌رزان ب ده‌ستخوه‌ڤه ئینن و گۆت: ل نێزیك ژماره‌یه‌كا دی یا كلینیكان ل قه‌زایان ژی دێ كه‌ڤنه كاری.
ئه‌ڤ مالپه‌ره فرێکه
