لیژنا بلند یا به‌رهنگاریا كولێرایێ ل دهوكێ هاته پێكئینان
هاتیه بلاڤکرن روژا پێنج شه‌مبێ, 16 گولان 2013 - 11:27am
ب ئاماده‌بوونا قایمقامێن هه‌موو قه‌زایێن سه‌ر ب پارێزگه‌ها دهوكێ ڤه و ژماره‌كا زور یا رێڤه‌به‌رێن په‌یوه‌ندیدار روژا 15/5/2013 ل رێڤه‌به‌ریا گشتی یا ساخله‌میا پارێزگه‌ها دهوكێ كومبوونا ده‌سته‌یا بلند یا به‌رهنگاریا كولێرایێ هاته ئه‌نجامدان .
ئیسماعیل محه‌مه‌د، سه‌رپه‌رشتیا كۆمبوونێ دكر دیاركر كو ئارمانج ژ كۆمبوونێ لێك نێزیككرنا قایمقام و رێڤه‌به‌رێن چه‌ند رێڤه‌به‌ریێن خزمه‌تكاری بوویه كو هایداری ره‌وشا كونترۆلكرنا نه‌خۆشیا كولێرایێ ببن و ده‌سته‌یه‌كا بلند بهێته پێكئینان و گۆت: د كومبوونێ دا پلانه‌ك ل دۆر چاوانیا كونترۆلكرنا نه‌خۆشیێ هاته دارێتن و كارێ هه‌ر رێڤه‌به‌ریه‌كێ هاته ده‌ستنیشانكرن.
د.نزار عسمه‌ت ، رێڤه‌به‌رێ گشتی یێ ساخله‌میا پارێزگه‌ها دهوكێ دیاركر بو بابه‌تێ كولێرایێ دهوك باشتره ژ پارێزگه‌هێن دی و گوت : وه‌كو خوه به‌رهه‌ڤكرن بو وه‌رزێ هاڤینێ سالانه لێژنه ل سه‌ر ئاستێن بلند دهێنه پێكئینان، به‌لێ ژبه‌ركو ئه‌ڤ ساله كه‌مپا دومیز هه‌یه له‌ورا دێ جوداهی ل گه‌ل سالێن بوری هه‌بیت.
دیاركرژی كومبوونا هه‌می قایمقام و رێڤه‌به‌ران دێ بیته ئه‌گه‌ر پتر هه‌ما هه‌نگی هه‌بیت كو نه‌هێلن نه‌خوش رووبده‌ن و رونكرن پتر دێ بۆ لایه‌نێن په‌یوه‌ندیدار هه‌بن ل دۆر ره‌وشا نه‌خۆشیێ ل سنورێ پارێزگه‌هێ.
د.كاوه محه‌مه‌د ئه‌مین د كۆمبوونێ دا دیاركر كو ساخله‌می ب ره‌نگه‌كێ به‌رده‌وام دووڤچونا نه‌خوشیێن ب ڤی ره‌نگی دكه‌ت به‌ری وه‌كو په‌ژیان به‌لاڤ ببن و گۆت: د چه‌ند هه‌یڤێن بوری دورێن یازده هزار پشكنینا ن هاتینه كرن و خوشبه‌ختانه رێژا تووشبونێ ب كولێرایێ صفر بوویه.
د.سیروان محه‌مه‌د ئه‌سوه‌د، رێڤه‌به‌رێ كاروبارێن خوپاراستنێ دیاركر كو پشكنین ل هه‌موو قه‌زایان هه‌یه و ئه‌نجام دێ گه‌هنه هه‌موو لایه‌نێن په‌یوه‌ندیدار و خواست ده‌زگه‌هێن ئێمناهیێ هاریكاریێ ل گه‌ل بكه‌ن بۆ پتر كونترولكرنا بازاری.
دكۆمبونێ دا داخواز ژ رێڤه‌به‌رێن ئاڤ و ئاڤا ده‌وروبه‌را هاته كرن كو پتر شه‌ب و كلور ل به‌رده‌ست هه‌بن و سه‌خبێریا تۆرێن ئاڤێ بهێته كرن و ئاڤا پاقژ و یاگران تێكه‌لی ئێك نه‌بیت و هه‌موو كارمه‌ندێن كار ل سه‌ر بیرێن ئاڤێ دكه‌ن بهێنه پشكنینكرن، هه‌روه‌سا هاته خواستن هه‌مو ئاماده‌كاری بو كونترولكرنا نه‌خوشیا كولێرایێ به‌رده‌ست هه‌بن.
ئه‌ڤ مالپه‌ره فرێکه
