چاوانیا كێمكرنا نشته‌رگه‌ریێن قه‌یسه‌ری ل دهۆكێ‌ دهێته‌ گه‌نگه‌شه‌كرن

پشتی گرێبه‌ستا رێڤه‌به‌ریا گشتی یا ساخله‌میا پارێزگه‌ها دهوكێ‌ و رێڤه‌به‌ریا توندوتیژیا دژی ژنان ل پارێزگه‌ها دهوكێ‌ ل گه‌ل سه‌نته‌رێ‌ ئه‌سكه‌نده‌ریه‌ یێ‌ هه‌رێمی یێ‌ ساخله‌میێ‌ وپێشڤه‌برنا ژنێ‌ هاتیه‌ موركرن، سه‌نته‌رێ‌ ناڤبری رابوو ب گێرانا دو ووركشۆپان كو ئێك ژێ‌ ل دۆر چاوانیا كێمكنرنا نشته‌رگه‌ریێن قه‌یسه‌ری بوو.
د.نزار عصمه‌ت، رێڤه‌به‌رێ گشتیێ‌ ساخله‌میا پارێزگه‌ها دهوكێ‌ دیاركر كو یا گرنگه‌ تێكه‌لی دگه‌ل سه‌نته‌رێن ب ڤی ره‌نگی هه‌بن و گۆت: پشتی رێكه‌فتنێ‌ ئه‌ڤه‌ ووركشوپه‌ ئه‌م ده‌ست پێدكه‌ین و چوار ووركشوپ د وه‌رزێ‌ هاڤینێ‌ دا دێ‌ هێنه‌گێران كو هه‌ر ئێك ژ یا دیتر گرنگتره‌.
هه‌روه‌سا دیاركر ژی كو پێنگاڤێن بهێن دێ‌ ئه‌و بن ئه‌م هنده‌ك نوشداران فرێكه‌ینه‌ وێرێ‌ و دیسان زانكۆیا ئه‌سكه‌نده‌ریه‌ ده‌رگه‌هێ‌ خوه‌ ڤه‌كریه‌ كو قوتابیێن خواندنا بلند بۆ ماسته‌رێ‌ و دكتورایێ‌ وه‌رگرن.
راوێژكارێ‌ سه‌نته‌رێ‌ ئه‌سكه‌نده‌ریه‌ یێ‌ هه‌رێمی بۆ وه‌لاتێن ئه‌فریقی و عه‌ره‌بی د. ابراهیم مه‌عبوت دیاركر كو پشتی ئه‌و هاتین پێنگاڤێن گه‌له‌ك باش دهه‌موو واراندا ل هه‌رێما كوردستانێ‌ هاتینه‌ هاڤێتن و گۆت: ده‌مێ‌ ل سالا 2003 ئه‌ز هاتیم بارودوخه‌كێ‌ بێ‌ سه‌روبه‌ر بوو، به‌لێ‌ پشتی ده‌ه سالان پێنگاڤێن زۆر باش هاتینه‌ هاڤێتن ب تایبه‌ت دوارێ‌ ساخله‌میێ‌ دا ل هه‌رێما كوردستانێ‌، خالا دوێ‌ ئه‌وه‌ ل كه‌رتێ‌ ساخله‌میێ‌ زۆر حه‌زا پێشڤه‌چوونێ‌ هه‌یه‌، ئه‌ڤ چه‌نده‌ یا بوویه‌ پالده‌ره‌ك بۆ ئالوگوركرنا پێزانینان دنافبه‌را مه‌دا، و هه‌موو پێشڤه‌چونێن وارێ‌ زانستێ‌ ساخله‌میێ‌ دا، ئه‌ڤ ووركشوپه‌ دبیته‌ ئه‌گه‌ره‌ك بۆ نێزیكرنا مه‌ بو ئێك دوو و هیڤیا من ئه‌وه‌ دڤێ‌ ووركشوپێ دا سه‌ركه‌فتیی بن.
تایبه‌تمه‌ندا ژنان ل سه‌نته‌رێ‌ ساخله‌میێ‌ ل ئه‌سكه‌نده‌ریه‌ د. هه‌نا محه‌مه‌د قاسم دیاركركو سمینارا وێ‌ دڤێ‌ ووركشوپێ‌ دا ل دوور بابه‌تێن كێمكرنا ئێش و ئازارێن زارۆبوونێ‌ یه‌ و دیسان كێمكرنا رێژا زارۆبوونێ‌ ب رێیا كریارێن نشته‌رگه‌ری و گۆت: دێ‌ چه‌ندین كریارێن وه‌رزشی بۆ ژنێن دوگیان دیاركه‌ین كو ئه‌ڤ وه‌رزشه‌ هاریكاره‌ بو ماسولكێن به‌رپرس ل ده‌مێ‌ زارۆبوونێ‌ كو ب ساناهی زارۆ بیت، چونكو ئه‌نجامدانا ڤی جورێ‌ وه‌رزشێ‌ دبیته‌ ئه‌گه‌رێ‌ كێمكرنا نشته‌گه‌ریێن زاروبوونێ‌ ، هه‌روه‌سان ئه‌ڤ كریارێن وه‌رزشی بو ژنا دووگیان باشه‌، چونكو پێدڤی ب ده‌رمان و ده‌رزیكدانانێ‌ نابیتن، دیسان ئه‌م دێ‌ نوشداران فێری ڤان وه‌رزشا كه‌ین داكو ئه‌و  ژنێن دوگیان فێر بكه‌ن و ژ مه‌ها پێنج ژ دوگیانێ‌ ژنوو دێ‌ ده‌ست ب ڤێ‌ جورێ‌ وه‌رزشێ‌ كه‌ن و هه‌تا ده‌مێ‌ زارۆبونێ‌ ، ب ڤێ‌ رێكێ‌ هێدی هێدی دایك دێ‌ هه‌ست پێكه‌ت كو زارۆبوونه‌كا بێ‌ ئازار په‌یداببیت.