44 نشته‌رگه‌ری و قه‌سته‌رێن دلی ژلایێ تیمێ ئیتالی بۆ زارۆیێن دهۆكێ هاتنه كرن
هاتیه بلاڤکرن روژا ئێک شه‌مبێ, 3 چریا دووى 2013 - 10:30am
د پرێس كونفرانسه‌كێ هه‌ڤپشك دناڤبه‌را رێڤه‌به‌ریا گشتی یا ساخله‌میا پارێزگه‌ها دهۆكێ و قونسلخانا ئیتالی ل هه‌رێمێ ب ئاماده‌بوونا ( كارمیلۆ فیكارا) قونسلێ ئیتالیا ل هه‌ولێرێ، دیاركر كو شاندێ نوشدارێن ئیتالی شیان 13 نشته‌رگه‌ریێن دلی بۆ نه‌خۆشان ئه‌نجام بده‌ن كو ئێك ژوان زارۆكه‌كێ 20 رۆژی بوو و ل گه‌ل ژنه‌كا 45 سالی كو حاله‌تێن وان گه‌له‌ك د مه‌ترسیێ دابوون.
دوهی ل ده‌مژمێر 9ێ سپێدی ل نه‌خۆشخانا ئازادی ل دهۆكێ، د.به‌ختیار ئه‌حمه‌د رێڤه‌به‌رێ گشتیێ ساخله‌میا پارێزگه‌ها دهۆكێ دیاركر ژی كو شاندێ ناڤبری 31 كریارێن قه‌سته‌را دلی بۆ زارۆیان ئه‌نجام داینه و گۆت: شه‌ش ژ وان قه‌سته‌را گه‌له‌ك ب زه‌حمه‌ت بوون و بۆ جارا ئێكێ بوون ل سه‌ر ئاستێ عیراقێ هاتینه كرن و ل گه‌ل ڤێ چه‌ندێ ژی تیمێ ناڤبری پشكنینا 300 نه‌خۆشان كر كو بۆ جارێن بهێت بشێن یێن پێدڤی چاره‌بكه‌ن.
د.به‌ختیار دیاركر ژی د سالا 2013 ێ دا رێڤه‌به‌ریا گشتی یا ساخله‌میا پارێزگه‌ها دهۆكێ شیایه هاریكاریا 19 نه‌خۆشێن دلی بكه‌ت داكو نشته‌رگه‌ریێن ب زه‌حمه‌ت ل ده‌رڤه‌ی وه‌لاتی بۆ بهێنه ئه‌نجامدان و كوژمێ ل وان نه‌خۆشان هاتیه مه‌زاختن گه‌هشتیه پتر ژ 155 سه‌د و پێنجی و پێنج ملیون دیناران و گۆت: نوكه رازه‌مه‌ندی هاتیه كرن بۆ مه‌زاختنا 230 ملیون دینارێن عیراقی بۆ ژماره‌كا نه‌خۆشێن دیتر كو ل ده‌رڤه‌ی وه‌لاتی بهێنه نشته‌رگه‌ریكرن.
هه‌روه‌سا قونسلێ ئیتالیا دیاركر كو ئه‌و ب چه‌ند شێوازان پشته‌ڤانیا ساخله‌میا دهۆكێ دكه‌ن ئه‌وژی ب هه‌ڤكاریا رێكخراوا هیڤی نازدار یا زارۆیان و گۆت: ئه‌ڤ هه‌ڤكاریه دێ یا به‌رده‌وام بیت هه‌تا ئه‌م بشێین خزمه‌تا هه‌موو زارۆیێن نه‌خوش بكه‌ین و گۆت: ب مه‌شقدانا چه‌ند نوشداران ل ساخله‌میا دهۆكێ بۆ سالێن بهێت دێ پترین خزمه‌ت ل سه‌نته‌رێ دلی ل دهۆكێ هێنه پێشكێشكرن.
ئه‌ڤ مالپه‌ره فرێکه
