٢٦٩ نەخۆشێن پەنجەشێرێ ل دھۆکێ گیانێ خوە ژدەست دایە و ٥١ ژێ چارەسەربووینە
هاتیه بلاڤکرن روژا جارشه‌مبێ, 5 شوات 2014 - 8:49pm
٢٦٩ نەخۆشێن پەنجەشێرێ ل دھۆکێ گیانێ خوە ژدەست دایە و ٥١ ژێ چارەسەربووینە
ب مەرەما پتر ھشیارکرنا جڤاکی و پشتەڤانیا نەخۆشێن پەنجەشێرێ، رێڤەبەریا گشتی یا ساخلەمیا پارێزگەھا دھۆکێ رابوو ب ساخکرنا رۆژا جیھانی یا پەنجەشێرێ.
د رێ و رەسمان دا کو ژمارەکا پەرلەمانتارێن عیراقێ و کوردستانێ و قایمقامێ قەزا دھۆکێ ئانادەببوون چەند چالاکی ھاتنە ئەنجامدان.
رێڤەبەرێ گشتیێ ساخلەمیا پارێزگەھا دھۆکێ د. نزار عسمەت، دیارکر کو پێدڤیە ژلایێ حکوومەتێ و ساخلەمیێ گرنگی ب ڤان بیرەوەریا بھێتەکرن و خەلکێ مە بھێتە ئاگەھدارکرن ل سەر خوپارستن و چارەسەریا وێ و گۆت: ل دووڤ ئامارێن ٢٠١٣ دیاردبیت کو ٤٩٨ نەخوشێن نوو ھاتینە تۆمارکرن و ٥١ زارۆ ژی چارەسەربووینە و دورێن ١١ ملیار دیناران ل نەخوشێن پەنجەشێرێ ل دھۆکێ ھاتینە مەزاختن بۆ کرینا دەرمان و کەل و پەلێن پێدڤی کو ژوانژی ٨٨٠ ملیون دینار وەکو ھاریکاری بۆ نەخۆشان ھاتینە دان.
د.نزار عسمەت ئەوژی دیارکر کو ٢٦٧ نەخۆشان گیانێ خوە ژدەستداینە و ئەگەرێن مرنا وان دزڤرنەڤە بو نە زوو دەستنیشانکرنا وێ و ھندەک ژوان زوو بەربەلاڤ دبن و کونترولکرنا وێ ب زەحەەت کەڤیت و گۆتیژ: پەنجەشێر ل دھۆکێ بەر ب زێدەبوونێ یە ژبەرکو ژمارەکا زورا نەخۆشان ل دەڤەرێن دەرڤەی ئیدارا ھەرێمێ و کوردێن رۆژئاڤا ژی ل دھۆکێ دھێنە چارەسەرکرن.
ل دووماھیێ ژمارەکا پەرستارێن پشکا پەنجەشێرێ و نەخۆشێن کو ژ نەخۆشیێ چارەسەربووین ھاتنە خەلاتکرن.
د. زەکی عەلی بەرواری تابەتمەندێ نەخوشێن پەنجەشێرێ و نەخوشێن خوینێ دیارکر کو ل سەرانسەری دونیایێ رێژەیا تووشبوونێ ب پەنجەشێرێ دزێدەبوونێ دایە و گۆت: ھەکە ئەم پالپشتیێ ل سەر رێژا ئاکنجیێن دەڤەرێ بکەین دێ دیاربیت سالا (٢٠١٣) دۆرێن ٧٣ نەخۆشان زێدەتر ژ سالا بۆری ھاتینە تۆمارکرن و ژبەرکو ژمارەکا مەزن یا نەخوشان ل دەرڤەی ھەرێمێ نە لەورا ئەوژی بوویە بارگرانی ل سەر پارێزگەھا دھۆکێ و پێدڤیە پتر پشتەڤانی ل ساخلەمیا دھۆکێ بھێتە کرن.
ئه‌ڤ مالپه‌ره فرێکه
