د رۆژا جیهانیا داپیركا دا: هژماره‌كا هولێن زارۆبوونێ ل كه‌مپان دێ هێنه‌ ڤه‌كرن

هێشتا هنده‌ك ژن ب تنێ ل ده‌مێ زارۆبوونێ قه‌ستا نوشداران دكه‌ن
ل هۆلا نه‌خوشخانا ژنان و زارۆبوونێ، رۆژا جیهانیا مامانێ هاته‌ ساخكرن و تێدا رێڤه‌به‌رێ گشتیێ ساخله‌میا پارێزگه‌ها دهۆكێ و رێكخراوا  UNFDPA  ئاماده‌بوون و  هژماره‌كا چالاكیا هاته‌ ئه‌نجامدان.
د. نزار عسمه‌ت، رێڤه‌به‌رێ گشتیێ ساخله‌میى ل پارێزگه‌ها دهۆكێ دیاركر ژبه‌ر گرنگیا ساخله‌میا دایكێن دوگیان وده‌مێ دوگیانى و پشتى زارۆبوونێ رێڤه‌به‌ریا گشتى یا ساخله‌میا دهۆكێ گرنگیه‌كا تایبه‌ت ب ڤێ رۆژێ دده‌ت و به‌رده‌وام پرۆگرامێن پێشڤه‌برنا شیانێن ڤێ پێشه‌یێ پێشكێشى وان دكه‌ت و گۆت: هه‌ر ئالوزیه‌ك ل ده‌مێ زارۆبوونێ تووشى زارۆى ببیت دبیته‌ هوكارێ وێ چه‌ندێ كارتێكرن ل ساخله‌میا وى ب درێژیا ژیانێ ببیت و ئه‌ڤ چه‌نده‌ بارگرانیه‌ بۆ ده‌زگه‌هێن ساخله‌میێ، له‌ورا ژى ڤێ پێشه‌یێ تایبه‌تمه‌ندیا خوه‌ هه‌یه‌.
د. نزار عصمت ئه‌وژى دیاركر كو ب هه‌ڤكاریا رێكخراوا unfpa چه‌ندین هولێن ساخله‌میا دایكا ل كه‌مپا دێ هێنه‌ دروستكرن ژبو پێشئخستنا كارى ساخله‌میێ تایبه‌تى دبوارى زارۆبوونێ و ساخله‌میا دایكێن دوگیان وره‌وشا ساخله‌میا زارۆیان پشتى ژ دایكبوونێ.
ل دۆر گازندێن وه‌لاتیان كو ل ده‌مێ زارۆبوونێ پاره‌ ژ ژنێن دوگیان دهێنه‌ وه‌رگرتن، د.نزار عصمه‌ت گۆت: وه‌رگرتنا پاره‌ى ژلایێ هه‌ر فه‌رمانبه‌ره‌كێ ساخله‌میێ ل دووڤ یاسا وه‌زاره‌تا ساخله‌میێ رێك پێ ناهێته‌ دان و هه‌ر حاله‌ته‌كێ ئه‌م پێ بهێینه‌ هایداركرن دێ دووڤچوونى ل سه‌ر كه‌ین و وى فه‌رمانبه‌رى سزا ده‌ین.
هه‌ر ب وێ هه‌لكه‌فتێ رێكخراوا unfpa هژماره‌كا كه‌لوپه‌لێن نوشدارى پێشكێشى ساخله‌میا دهۆكێ كرن، ینستور ئویوماهاگى، رێڤه‌به‌رێ گشتیێ رێكخراوا unfpa دیاركر ئه‌ڤه‌ نه‌ ئێكه‌مین جاره‌ ئه‌و پشته‌ڤانیا ساخله‌میێ دكه‌ن و گۆت: د رۆژا جیهانیا داپیركا دا مه‌ حه‌ز دكر ناڤ چالاكیێ دا به‌رهه‌ڤ ببین وهه‌ماهه‌نگیه‌كا باش دناڤبه‌را مه‌ دا یا هه‌ى دڤێ رۆژى دا مه‌ هاریكارى گه‌هاندنه‌ ساخله‌میێ و هه‌رده‌م دێ پشته‌ڤانیێن ساخله‌میێ بین و گۆت: ئاریشا هه‌ره‌ مه‌زن ئه‌وه‌ هێشتا هنده‌ك ژن ب تنێ ل ده‌مێ زارۆبوونێ قه‌ستا نوشداران دكه‌ن.