یابانێ پرۆژی بەنکا خوینی ل دھۆکێ ڤەکر

رێڤەبەبەرێ گشتیێ ساخلەمیا پارێزگەھا دھۆکێ دیارکر کو ئەڤرۆ ١٦/١٠/٢٠١٨ ب ئامادەبوونا فەرھاد ئەمین پارێزگاری دھۆکێ و کات سومی مۆریوسو، بالوێزێ وەلاتێ یابانێ ل ھەرێما کوردستانێ و رێکخراوا (pwj) پرۆژی نووژەنکرن و دووبارە رێکخستنا بەنکا خوینێ ھاتە ڤەکرن.

فەرھاد ئەمین پارێزگارێ دھۆکێ دیارکر کو پشتەڤانیا وەلاتێ یابانێ بۆ ھەرێما کوردستانێ ب گشتی و ب تایبەتی بۆ پارێزگەھا دھۆکێ ب تایبەتی ژی بۆ کەرتێ ساخلەمیێ نیشانا وێ چەندێ یە ئەو گرنگیەکا مەزن ددەنە وارێ ساخلەمیێ و دیارە ژی ئەو فشارا ل سەر ساخلەمیێ ھەیی ژ بەر ئاواران و پەنابەران ھەروەسا ژی خەلکێ مە ژی رۆژانە زێدە دبیت ئەو ژێرخانا ساخلەمیێ د ئاستێ پێدڤی دا نەبوویە لێ سەرەرایی وێ چەندێ ژی ل سنۆری پارێزگەھا دھۆکێ خزمەتەکا باش ھاتیە کرن د وارێ ساخلەمیێ دا، پشتەڤانیا یابانێ یا بەردەوامە و بەری نوکە ل سنۆری زاخۆ کەمپ بۆ ئاواران دروستکرینە و پرۆژەیێن دی ژی ئەنجامداینە ب تایبەتی ژی ب ریێا رێکخراوا (pwj ) تشتەکی جوان و رێک و پێک ھاتیە دروستکرن ل بەنکا خوین.

پارێزگارێ دھۆکێ گۆت: مە دڤیا ژێرخانەکا باشتر ل ساخلەمیێ ھاتبا دروستکرن د پێنچ سالێن بۆری دا لێ ژ بەر قەیرانا دارایی گەلەک کارتێکرن ھاتە کرن و نەخۆشخانێن پێدڤی نەھاتنە دروستکرن بشێین ب ریێا وان نەخۆشخانا پتر خزمەتا خەلکێ خوە بکەین.

د. نزار عسمەت تەیب، رێڤەبەرێ گشتیێ ساخلەمیا پارێزگەھا دھۆکێ دیارکر کو پرۆژێ بەنکا خوینێ ھاتە ڤەکرن ژ لایی وەلاتێ یابان ڤە ھاتیە نووژەنکرن و بەرفرەھکرن پرۆژە دووبارە کەڤتە دخزمەتا خەلکێ دھۆکێ دا د ماوەیەکێ گەلەک کورت دا رێکخراوا (pwj) شیا پرۆژی بەنکا خوینێ نووژەن بکەت و ب شیوەیەکێ نوو کەفتە دخزمەتا خەلکی دا پتر ژ ١٠٠ ھزار دولارێن ئەمریکی ل پرۆژەیی ھاتینە مەزاختن بۆ دووبارە رێکخستن و نووژەنکرنا بەنکا خوینێ.