کونفرانسێ پێداچوونا سالانە یێ ساخلەمیا دھۆکێ ھاتە گێران

ب چاڤدێریا بەرێز د.رێکەوت حەمە رەشید، وەزیرێ ساخلەمیێ ل حکوومەتا ھەرێما کوردستانێ و ب ئامادەبوونا بەرێز تەمەر رەمەزان پارێزگارێ دھۆکێ و ژمارەکا پەرلەمانتارێن عیراقا فیدرال و ھەرێما کوردستانێ، ئەڤرۆ 2014/1/23 کونفرانسێ پێداچوونا سالانە یێ رێڤەبەریا گشتی یا ساخلەمیا پارێزگەھا دھۆکێ ھاتە گێران.

پشتی دەقیقەکێ رێزگرتن بۆ گیانێ شەھیدان ل گەل سرۆدا ئەی رەقیب، کونفرانسێ ساخلەمیێ ب پەیاما بەرێز ( نێچیرڤان بارزانی) سەرۆکێ حکوومەتا ھەرێما کوردستانێ ل دەمێ دەست ب کاربوونا کابینا حەفتێ دەستپێکر.

ددووڤدا رێڤەبەرێ گشتیێ ساخلەمیا پارێزگەھا دھۆکێ د.نزار عصمت پەیڤەک پێشکێشکر و تێدا دیارکر کو سالا ٢٠١٣ سالا سەرکەفتنا کەرتێ ساخلەمیێ بوو و د پەیڤا خوەدا ئاماژە دا کو د سالا ٢٠١٣ چەندین پرۆژێن ستراتیژی بۆ ساخلەمیا دھۆکێ ھاتینە پەسەندکرن، ژوانژی دانانا بەرێ بنیاتی بۆ ژمارەکا نەخۆشخانا ژوانژی نەخۆشخانا تەنگاڤیان یا گشتی و ئافرەت و زارۆکبوونێ و پەنجەشێرێ و نەخوشخانەک ل قەزا بەردەرەش و ئێک ژی ل دەڤەرا شێلادزێ ل گەل چەندین بنگەھێن ساخلەمیێ کو ھەموو دێ بنە بنیاتەک بۆ بھێزکرنا ژێرخانا ساخلەمیێ ل دھۆکێ.

د.نزار عصمت بەحسێ وێ چەندێ کر کا چ پێدڤیە بۆ پاشەرۆژێ ژی بھێتە کرن و دیارکر کو دپلاندایە ژمارەکا زورا پرۆژان بھێنە بحھئینان وەکو ئاڤاکرنا رێڤەبەریا خوپاراستنا ساخلەمیێ و بەنکا خوینێ و سەنتەرەکێ تایبەت یێ راھێنانا پیشەیی بۆ پێشڤەبرنا شیانێن کارمەندێن ساخلەمیێ ب ھەموو واران دا و سۆپاسیا سەرۆکێ حکوومەتێ و وەزیرێ ساخلەمیێ و پارێزگارێ دھۆکێ و وەزیرێ پلاندانانێ یا حکومەتا هەرێما کوردستانێ کر بۆ پشتەڤانیا وان یا بەردەوام بۆ کەرتێ ساخلەمیێ ل دھۆکێ.

ددووڤدا د.رێکەوت حەمە رەشید، وەزیرێ ساخلەمیێ ل حکوومەتا ھەرێما کوردستانێ پەیڤەک پێشکێشر و تێدا سۆپاسیا رێڤەبەریا گشتی یا پارێزگەھا دھۆکێ کر بۆ پرۆژە و چالاکیێن ئەنجام داین کر و بەرھەڤیا خوە بۆ چارەکرنا ھەر ئاریشەکێ دەبری و خواست کو ژێرخانا ساخلەمیێ ل دھوکێ بەر ب پێشڤە بچیت.

پاشان کونفرانس ھاتە دابەشکرن بۆ دو پەنەلان کو پەنەلێ ئێکێ یێ تایبەت بوو ب دەستکەفتێن ساخلەمیێ و ئاریشەیێن پلاندانێ ل گەل گرنگترین پرۆژێن ئەندازیاری و پەنەلێ دوێ ژی یێ تایبەت بوو ب فێرکرنا کارمەندان و ستافێ ساخلەمیێ ب گشتی و دیسا چالاکی و ئاریشەیێن خوپاراستنا ساخلەمیێ و ل گەل خزمەتێن بۆ پەنابەرێن کەمپا دومیز ھاتینە پێشکێشکرن و ل دووماھیا ھەر پەنەلەکی دەرگەھێ گەنگەشێ ھاتە ڤەکرن .